এপাহি গোলাপত প্ৰেমৰ সুৱাস

 

এপাহি গোলাপত প্ৰেমৰ সুৱাস
--------------------------------------------------

ড° ৰ'জলীনা কলিতা

পুনে, মহাৰাষ্ট্ৰ

প্ৰেম এক অনামী অনুভূতিI অজানিতে হৃদয়ত আহি ভুমুকি মাৰেহিI দেহ মন চঞ্চলা কৰেহিI নিস্বাৰ্থ মৰমবোৰ হৈ পৰে চালি, বিশ্বাসবোৰ হয় বেৰI ভালপোৱাৰ কোঠাত বুকুৰ মাজত সাৱটি লয় আৱেগক, হেঁপাহকI প্ৰেম ক'ত নাই? প্ৰেম বতাহত আছে, বৰষুণৰ টোপালটো আছেI প্ৰেম আৱেলিৰ ৰামধেনুত আছে, এন্ধাৰৰ মাদকতাতো আছেI গছ, লতা, বিৰিখ, চৰাইৰ চি-চিঁয়নি মাতে, সকলোৱে প্ৰেমৰ কথাকেই কয়I নিজৰ ভালপোৱাজনক মনৰ অনুভূতিৰ কথা প্ৰকাশ কৰিবলৈ আমি চিঠি নাইবা ফুলৰ সহায় লঁওI চিঠিৰ মাজতো এপাহ ফুল প্ৰিয়জনলৈ বুলি পঠাওI ফুল বুলি কলেই মনলৈ আহে প্ৰেম,মৰম,ভালপোৱাৰ অনুভূতিI ফুলে আনে মনলৈ আনন্দI কিমান প্ৰকাৰৰ যে ফুল আছে এই পৃথিৱীখনতI সকলো ফুলৰেই বেলেগ বেলেগ সৌন্দৰ্য্য, সুৱাসI প্ৰিয়জনে দিয়া প্ৰতিপাহ ফুলতেই থাকে মৰমৰ সুগোন্ধI কোনোবাই কপৌ ফুল খোপাত গুজি দিয়েহি আকৌ কোনোবাজনে বকুল ফুল হাতৰ মুঠিতI কিমান গীতিকাৰে গীত ৰচিছে ফুলক লৈI তাৰ মাজত এপাহি ফুলৰ আকৰ্ষণেই সুকীয়াI হয়, সেয়া গোলাপ ফুলI হয়তো সেইবাবেই গোলাপ ফুলৰ ৰাণীI গোলাপ ফুলক লৈও বহু কবিয়ে ৰচিছে কবিতাI কবি ৰঘুনাথ চৌধুৰীদেৱে তেখেতৰ 'গোলাপ' কবিতাত প্ৰকাশ কৰিছে এনেদৰে--
'কাৰ পৰশত ফুলিলি বান্ধৈ
অ মোৰ সাদৰী ফুলাম পাহি?
শ্যামলী পাতৰ ওৰণি গুচাই
কাৰ ফালে চাই মাৰিলি হাঁহি?
আকৌ ক‌বি হীৰেণ ভট্টাচাৰ্যদেৱে লিখিছে--
'এন্ধাৰে এন্ধাৰে
এটি জোনাকী উৰি
আহি মোৰ বুকুত শুলে
তোমাৰ কথা ভাবিলে
আকাশত নিৰলে এটি তৰাফুল ফুলে
মোৰ বুকুত এজোপা গোলাপ
কোনে ৰুলে?
তেজত এটোপা আতৰ ঢালি
হৃদয় কোনে চুলে?

       ফুলৰ ৰাণী গোলাপ পাহিৰো যে আছে উদযাপনৰ দিনI হয়, ঠিকেই অনুমান কৰিছে, ৭ ফেব্ৰুৱাৰীৰ দিনটোৰ কথাই ক'ব লৈছোI ৭ ফেব্ৰুৱাৰী দিনটো ৰ'জ ডে হিচাপে উদ্‌যাপন কৰা হয়I ভেলেন্টাইন ডে'ৰ সপ্তাহটোৰ প্ৰথম দিনটো হৈছে ৰ'জ ডে'I চেইন্ট ভেলেন্টাইনক সুঁৱৰি ১৪ ফেব্ৰুৱাৰী দিনটো ভেলেন্টাইন ডে হিচাপে পালন কৰা হয়I কিন্তু ৭ ফেব্ৰুৱাৰীৰ পৰা ১৩ ফেব্ৰুৱাৰী লৈ বিভিন্ন নামৰে দিনকেইটা পালন কৰা হয়I ৰ'জ ডে, প্ৰপজ ডে, চকলেট ডে, টেডী ডে, প্ৰমিজ ডে, হাগ ডে, কিছ ডেI এই সপ্তাহটোক 'ৰোমাঞ্চ উইক' বুলিও জনা যায়I 'ৰোমাঞ্চ উইক'ৰ প্ৰথম দিনটো ৰ'জ ডে হিচাপে পালন কৰা হয়I এই দিনটোত প্ৰেমাস্পদে ইজনে সিজনক গোলাপ ফুল উপহাৰ হিচাপে দিয়েI আকৌ কিছুমানে সেইদিনাখন প্ৰিয়জনক প্ৰেমৰ প্ৰস্তাৱ দিয়ে এপাহি গোলাপ ফুলৰেI সঁচাকৈয়ে গোলাপ ফুল পাহিৰ কথাই সুকীয়াI গোলাপ ফুল পাহিৰ দৰেই প্ৰেম কোমল, স্পৰ্শকাতৰI

       প্ৰেমৰ কোনো সুকীয়া দিন নাই উদ্‌যাপনৰI প্ৰেম আকাশে, বতাহে সকলোতে আছে সদায় আছেI তথাপি ব্যস্ততা ভৰা জীৱনত প্ৰিয়জনৰ বাবে কোনোবা এটি দিনত বিশেষ কিবা এটি কৰিব পালে মনটো নিশ্চয় আনন্দত নাচি উঠিবI সেয়ে আহকচোন, ৰ'জ ডে'ত প্ৰিয়জনক উপহাৰ দিঁও এপাহি গোলাপI ক'ব খুজি থকা বহু কথা 'ৰোমাঞ্চ উইক'ৰ প্ৰথম দিনটোতেই প্ৰকাশ কৰোI

        ************

@Published in Asomiya Khabar, 07/02/2022